|
Martes, 02 de Agosto do 2005 |
 CONTROL
Moncho Fernández Leal
A decisión dos ministros do interior da Unión Europea despois dos
atentados de Londres de controlar os correos electrónicos e os
teléfonos móviles ten que facer reflexionar.
Logo dos ataques do 11-S , vai xa para catro anos, sucedéronse as
invasións e bombardeos de Iraq e Afganistán. As xustificacións xa están
esquecidas. En Afganistán atacaban para atopar a Ben Laden. En Iraq
para buscar unhas armas que non existen. O conto é que seguen a estar
nos dous países, onde impuxeron un cambeo de goberno.
Sería a mesma a reacción dunha parte importante da sociedade se non se
produciran os ataques ás torres? En todo caso, que influencia ten nas
poboacións expoliadas do chamado terceiro mundo os ataques ás
metrópolis occidentais? A quen benefician?
Nun momento no que se cuestionaba as relacións norte-sur, cando se
escoitaban voces non oficiais denunciando a montaxe da condonación da
débeda externa e o papel do Fondo Monetario Internacional no cumio do
G-8, as bombas de Londres calan calquera resposta. O centro da
información pasa a ser outro.
O sistema precisa controlar todos os movementos, toda a información
para que o cerne quede a salvo. O control dos recursos básicos e a
propiedade privada dos medios de producción son intocábeis. Para que
defendan a idea de Deus, precisan ao Demo. Bush xa falou do imperio do
Ben contra o Mal.
A invocación de que se loitaba contra o terrorismo deu pé, só no estado
español, ao peche de periódicos, dunha revista, dunha radio, a
ilegalización dun grupo, a detencións por pensar distinto e a
criminalización de ideas.
Non se sabe moi ben cal é o obxectivo político das bombas, pero si se
percibe ben quen sae beneficiado. Quen controla ao estado que vai
pinchar teléfonos, ler correos, entrar na intimidade? |
