|
Galiza importa o 77% da enerxía primaria que utiliza No ano 2004 o 86% da enerxía primaria procedeu directamente de combustíbeis fósiles (carbón, cru de petróleo e derivados, gas natural). Nese mesmo ano Galiza importou 10 millóns de toneladas equivalentes de petróleo (tep) de enerxía primaria e produciu 3 millóns de tep. Xa que logo o 77% da enerxía primaria utilizada en Galiza é importada. O 54% dos 3 millóns de tep de enerxía primaria propia procede da queima de lignito pardo estraído nas minas de As Pontes e Meirama que están piques de se esgotar.
Estes son os datos máis relevantes das "Dez preguntas básicas sobre a enerxía en Galicia" da asociación ecoloxista Verdegaia. En 2004 o consumo de produtos petrolíferos foi de 4 millóns de pet dos qeu o transporte consumiu o 47%. O consumo de electricidade nese mesmo ano foi de case 1,6 millóns de tep dos que o 57% foi demamdado pola industria. Unha parte moi importante da demanda industrial procede dunha poucas industrias extremadamente consumidoras como a Alúmina de San Cibrao. Como xa vimos Galiza importa o 77% da enerxía primaria que utiliza. Cando se di que Galiza exporta enerxía faise referencia á exportación de enerxía eléctrica ou produtos petrolíferos refinados na Coruña. Porén Galiza non exporta ningún tipo de enerxía primaria. Como alternativa ao actual modelo enerxético Verdeagia propón a utilización de enerxías renovábeis e cita un informe encargado por Greenpeace ao Instituto de Investigacións Enerxéticas da Universidade Pontificia de Comillas. Este informe conclúe que Galiza podería ser totalmente autosuficiente utilizando enerxías renovábeis para a produción de enerxía eléctrica no ano 2050. Verdegaia rexeita a enerxía nuclear por perigosa ao non existir unha solución segura ao problema dos refugallos nucleares que seguen emitindo radioactividade durante miles de anos e tamén por ser unha fonte non sustentábel. |
