|
 África oculta
Moncho Fernández Leal En Chicago hai máis médicos etíopes ca na mesma Etiopía. A Organización Mundial da Saúde considera que África necesita de xeito inmediato un millón de médicos. A realidade amosa, non obstante, que cada ano marchan 23 mil profesionais sanitarios dos países africanos ao Reino Unido, Estados Unidos, Nova Celandia e Australia.
A emigración destes traballadores, que tanto custa formar, non é só polas remuneracións. Hai que ter en conta tamén as condicións nas que se actúa, os recursos que non se teñen, a sobrecarga de traballo. Por outra banda, no mundo desenvolvido e expoliador o envellecemento da poboación demanda persoal médico que o sistema non pode ofertar porque existe unha formación médica que é deficitaria en número. No continente africano morreron xa 12 millóns de persoas afectadas pola Sida. Alí están o 64% das infeccións por esa síndrome, o que representa 25 millóns de persoas. A globalización, que só favorece ás transnacionais,non só disolve coma azucre na auga as costumes e culturas locais, senón que anula as posibilidades de sobrevivencia e corrompe a boa parte das dirixencias sociais. Os gobernos non teñen control nin da súa soberanía. Os obxectivos do milenio, proclamados con solemnidade nos cumios da ONU, falan de diminuir a mortalidade infantil e a fame. Pretensións nada radicais, pero imposibeis de cumplir mentras exista esa mentira que é a débeda externa e esas guerras intestinas nun continente cheiño de armas que son todas importadas. A comunidade internacional non pode ficar conforme con celebrar unha vez cada ano o día da fame ou da Sida. Xa que a dos gobernos non é real, hai que traballar na unión dos pobos. |
