|
 Tódolos partidos que concorren ás eleccións en Tomiño se posicionan sobre o proxecto “Coto Pinzás”, excepto o PP
Despois da publicación por parte de InfoRosal.com do informe sobre o Complexo Deportivo, Turístico e Residencial “Coto Pinzás” a pasada semana, enviamos a todos os grupos políticos con representación no concello BNG, PSOE, CdT e PP, así como ás candidaturas independentes que se presentan ás eleccións municipais e que non teñen neste momento representación, Unión Veciñal e Alternativa Tomiñesa, un cuestionario de preguntas para que se posicionaran sobre este proxecto, que a día de hoxe, todos nos contestaron, salvo o PP.
O posicionamento de cada partido publicarémolo íntegramente o vindeiro luns, tal cual nos foi enviado e poderase descargar en formato .pdf. As cuestións que plantexamos eran a grandes rasgos: - Sobre a legalidade do proxecto. A utilidade prevalente do proxecto ás propias do monte.
- Modificación do PXOM para darlle uso residencial ao monte.
- Asociación de campos de golf a zonas residenciais. Valoración deste proxecto.
- Os valores medio ambientais. Auga. Contaminación.
- Patrimonio arqueolóxico.
- Impacto social.
Adianto das posicións En primeiro lugar cabe destacar que o Partido Popular non contestou a este cuestionario, polo que, tal e como lle fixemos saber a todos, o entenderiamos como un xeito de rehusar posicionarse sobre esta cuestión, aínda que xa adiantaron, votando favorablemente á aprobación inicial do modificación puntual no pleno celebrado o 1 de agosto de 2005, cal pode ser a súa postura final nesta cuestión. Como adianto das posicións das forzas políticas que sí nos contestaron, podemos dicer que BNG, PSOE e Unión Veciñal, mostran, ao noso entender, un claro rexeitamento ao proxecto, coincidindo tamén os tres en sinalar que se "crearía un grave precedente" para o monte galego posibilitando a recalificación de monte comunal en urbanizable a baixo prezo. Así a candidata nacionalista, Sandra González, pon á Costa Mediterranea, como exemplo do que non hai que facer, apostando, ao igual que Enrique Rodríguez de Unión Veciñal e o socialista, Santiago Vergara, en buscar alternativas sustentábeis para a zona. Pola súa banda CdT non descarta a posibilidade de "mellorar o proxecto" actual para que "estivese máis claro o interese social prevalente, incorporando iniciativas que poñan en valor o patrimonio arqueolóxico e natural de Pinzás". Asi mesmo, sobre a inclusión da zona na Rede Natura e no catálogo de humedais protexidos, consideran que se debe "compatibilizar a conservación da natureza co desenrolo das poboacións" e que, só se deben adoitar "fortes medidas de protección en áreas moi identificadas, facendo compatibles outros usos no resto". Alternativa Tomiñesa mostrase menos clara nas súas posicións, sobre todo nas cuestións referentes a utilidade pública ou interese social prevalente do proxecto ao do monte ou a modificación puntual do PXOUM. Lembramos que José Domínguez Iglesias, candidato número dous desta forza política, votou a favor da aprobación inicial no seu día, cando aínda formaba parte do Partido Popular. Mais consideramos que o mellor e que este luns poidan ver e ler as posicións de cada grupo político íntegramente, que serán publicadas aqui, para que vostedes, sobre todo os veciños e veciñas de Tomiño, saquen as súas conclusións. |
