|
CdT non apoiará os campos de golf de Pinzás se non se garante a auga e a viabilidad do proxecto deportivo Esta é unha das conclusións ás que se chegou tralas reunións mantidas polos promotores e CdT no marco dunha serie de conversacións que se están realizando cos distintos Grupos Políticos con representación no Concello de Tomiño.
Este proxecto, como se recordará, pretende a construción de 850 vivendas en terreo comunal, dous campos de Golf e outras instalacións deportivas. Os independentes expuxeron as súas dúbidas acerca da "admisibilidade" do proxecto por parte da Xunta de Galicia, ante o dubidoso "interese social prevalente" do mesmo e o cumprimento da lexislación medioambiental. Salvados, no seu caso, os informes autonómicos, Centristas, esixe para o seu apoio, entre outros, os seguintes condicionantes: Dar a coñecer o proxecto en todas as súas fases (incluíndo execución de viales, infraestructuras e áreas de reparto); Garantir a suficiencia de auga para a futura poboación de Pinzás e as parroquias adxacentes que se aproveitan actualmente dos nacentes, como poden ser as situadas no val de Tebra; informar e consultar a todos os posibles afectados polos novos viales que se pretenden realizar desde Pinzás ata a veciña parroquia de Santa María de Tebra; a realización dun estudo de viabilidade das instalacións deportivas; equilibrar as contraprestacións á comunidade veciñal, que podería supoñer o incremento do "xustiprecio", proposto inicialmente, dos terreos a expropiar. Por iso desde CdT piden informes independentes, encargados directamente polo Concello, a costa dos promotores, preferentemente a departamentos universitarios, antes de tomar calquera tipo de decisión. |
