|
 O Estado de Israel considérase maltratado nos medios de comunicación. E nós sen decatarnos. Unha activa rede internacional de asociacións de solidariedade con Israel, que tamén ten delegación na Galiza, asegura que a información e certas institucións públicas reservan inxustamente o papel de malvado para o governo de Ehud Olmert.
A indignada protesta móvenos a comprobar os agravios denunciados. Se ao que se refiren é a información sobre Palestina ocupada por Israel, o primeiro que chama aos ollos é que ningún medio acostuma darlle o nome verdadeiro de ocupación que, con todo, é o único que consideran Nacións Unidas. O Dereito internacional é terminante: o Estado de Israel ocupa ilegalmente a terra de Palestina. É un feito básico que non figura na información dominante, como non se fala das colonias promovidas por Israel en terras de Palestina. Eles din asentamentos: pasaban por alí e decidiron ficar. Nenos, mulleres e homes palestinos retirados da nómina dos vivos pola artillería dos helicópteros artillados de Israel (Palestina non ten forza aérea nin aeroportos) faleceron ou perderon a vida. O termo máis comprometido que os medios admiten para a poboación civil palestina varrida do mapa é o de abatidos. Un substantivo que adoita adxectivar reses mortas. A información que nos dan sobre Palestina ocupada admite a expresión eliminación selectiva para o asasinato dunha o varias persoas por decisión do mando militar israelita. A identidade e os direitos dos asasinados desaparecen baixo a lousa de terrorista, de baixa colateral ou de miliciano para sentenciar un civil baleado polo exército de ocupación. Chamalo miliciano é unha maneira xulgalo por vía sumaria e de implicar que estaba armado. O muro que fende terras de Palestina recibe o nome de valado de seguridade. Que queiras que non. E esta a información que a rede global dos amigos de Israel considera insultante e anti-semita? Que espacio lle queda aos palestinos (que tamén son semitas) para defenderen a súa terra? A resistencia palestina insiste en preguntar se o perigo obriga realmente a que os ocupen por terra, mar e aire ou se máis ben non estará a ocupación e o exilio na causa de todas as traxedias. Nin sequera esa pregunta ten lugar na desinformación que a profesora Genma Martín Muñoz chama cadea de inversións da realidade. |
