|
Entre outras, ás 16.30 proxéctase “Radio la Colifata” de Carlos Larrondo Play-Doc encara os tres días máis fortes do festival onde se agarda a maior presenza de público, e onde ás proxeccións súmanse as actividades paralelas: concertos, clase maxistral, e foro documental. Máis de mil persoas pasaron por Play-Doc até primeira hora da tarde de hoxe xoves.
As proxeccións arrincan das 12.30h con "Espidos" o primeiro dos documentais de animación que se proxecta. Trátase dunha serie documental animada, descarada e actual, na que nenos de 10 a 13 anos contan historias, persoais e divertidas, sobre os cambios que os seus corpos están sufrindo. Neste capítulo, Ilham de 13 anos, fala da menstruación. Nesta mesma sección proxectarase "Teño medo" da realizadora polaca Karolina Bendera, que forma parte da sección de Violencia de Xénero. O documental narra a traxedia Aniela e o seu fillo Chris, xunto á súa loita sen tregua por recuperar a súa dignidade. Pola tarde, ás 16.30h chegará "LT22 Radio La Colifata" que compite na sección de documentais galegos. O seu director Carlos Larrondo,que estará en Tui para presentar o documental, achéganos a historia desta emisora que emite desde os xardíns dun psiquiátrico de Bos Aires. Precisamente unha marca de refrescos escolleunos para protagonizar a súa última campaña publicitaria.
A sesión das 18.30h ofrécenos dúas proxeccións: o documental animado "Camuflaje" que explora a experiencia dun neno crecendo xunto ao seu pai esquizofrénico e "Non che enfades, pero..." un documental que plasma o amor como o xeito de dar sentido á existencia. "Jimmi Rosenberg: o pai, o fillo e o talento", ás 20.30h, abre a proxección de documentais de música abordando a historia de Rosenberg que nos seus primeiros anos foi considerado o sucesor de Django Reinhardt polas súas habilidades musicais. E para rematar ás 22.30h complétase o ciclo "A fabulosa arte de sobrevivir" de Lech Kowalksi con "Pola autoestrada de Hitler". Marta Andreu fala de "O documental de creación, formas de mostrar o cine do real". Ás 17h, na Aula Play-Doc terá lugar un Foro Documental a cargo de Marta Andreu que falará sobre "O documental de creación, formas de mostrar o cine do real". Marta Andreu é Licenciada en Comunicación Audiovisual pola Universitat Pompeu Fabra e ten un Máster en Documental de Creación polo IDEC / Universitat Pompeu Fabra. Participou diferentes producións documentais e desde 2001 coordina o Máster en Documental de Creació da Universidade Pompeu Fabra (IDEC-UPF). Esta charla vai dirixida sobre todo a profesionais, realizadores e estudantes. Na mesma tratará a distribución dos produtos audiovisuais. A entrada é libre ata completar o aforamento. Primeiro concerto Play-Doc: The Rosenberg Trío
Pola noite, a Sala Metropol acolle o primeiro dos concertos de Play-Doc 2008. The Rosenberg Trío actuará a partir das doce e media da noite. Serán precedidos por unha sesión de Erro Vídeo. A entrada custa 10€, póndose á venda media hora antes do concerto. Os Rosenberg criáronse rodeados de música do mesmo xeito que a maioría dos nenos nados dentro da tribo dos Manouche. O Gipsy-Jazz (Manouche-Jazz ou Jazz Xitano) recibiu o seu gran impulso grazas ao manouche máis coñecido, o lendario Django Reinhardt un dos guitarristas máis influentes do século XX.
Nese ambiente, e con só 10 anos, Stochelo, o maior dos tres, xa deixaba atónito a quen o escoitaba tocar a guitarra. Ao pouco tempo funda cos seus curmáns, Nonnie e Nousche, The Rosenberg Trio (1980) En 1989 o Trío tocaba no Festival Django Reinhardt e foi alí onde Stochelo foi bautizado co título do Sucesor de Django Reinhardt. The Rosenberg Trio deixaron a súa pegada en grandes escenarios e festivais: Festival de Jazz de Montreal, o de Xapón, no Carnegie Hall en Nova York, ou no Rose Bowl dos Angeles, e tocaron en directo con estrelas da talla de Stephane Grapelli e Jan Akkerman, ou acompañando a figuras tan recoñecidas como Shirley Bassey, Luciano Pavarotti ou Randy Crawford entre outros. Para Play-Doc supón toda unha honra poder compartir co seu público o impresionante talento destes tres músicos. The Rosenberg Trio acompañan ao documental "Jimmy Rosenberg: the father, the son & the talent" que se proxectará hoxe ás 20:30h. |
