|
Os afectados do Edificio Centro da Cañiza, reunidos unha vez máis o sábado pasado, decidiron crear unha asociación de afectados para pór fin á falta de luz nos pisos e zonas comúns, que desde fai xa dúas semanas vén preocupando aos propietarios.
Intentarán, como asociación, chegar a un acordo coa empresa encargada de fornecer luz para que dean luz ao edificio, xa que está disposta a pagar a luz consumida para poder vivir dignamente nas vivendas. Anteriormente, xa se puxeron en contacto coa empresa subministradora e coa conselleria de Industria pero aínda non lles deron solución ao problema. O problema abarca a moitos, como un dos escriturados, o cal ten que facer fronte á hipoteca adquirida e "co meu boletín correspondente ninguén me dá luz para vivir no piso". Este propietario ten unha filla pequena e ten a sorte de ter a un familiar que lle acolla mentres non se soluciona o problema da luz.
Outros accedían á compra da súa vivenda por primeira vez e agora están pensando en buscar un aluguer. "Teño os mobles postos, a cociña xa comprada e agora teño que pagar esa cociña e aínda non podo gozala", comenta outro dos afectados. A asociación só pretende que durante o tempo que dure o procedemento concursal, os propietarios que o desexen poidan habitar as súas vivendas, polo que non dubidarán en tomar todas as medidas oportunas para conseguir luz en zonas comúns e nos pisos de cada afectado, xa que moitos deles non teñen familiares que lles poidan acoller ou a posibilidade de pagar un aluguer ao mesmo tempo que seguen pagando os créditos dos pisos. Por este motivo instan aos organismos públicos para que medien no conflito e déanlles algunha solución. "Creo que non pedimos nada imposible, só poder ter os medios necesarios para ocupar as nosas vivendas", comenta o presidente da asociación, e á vez sinala que "se as administracións públicas ou calquera ente privado quere axudarnos ou porse en contacto connosco poden facelo na dirección do edificio "Asociación Afectados Edificio Centro", R/Fachendosos Enríquez, 1. 36880 A Cañiza (Pontevedra)". Como primeiras medidas de forza, a asociación dá a coñecer o seu estado a través de pancartas que colgan nos balcóns do edificio con mensaxes como "Escriturado e sen luz. Solución xa", "Non temos luz. Solució". Nas seguintes semanas volverán porse en contacto coas administracións, a empresa subministradora e mesmo co goberno local do concello da Cañiza, para que lles dean unha solución. |
