|
A xuntanza terá lugar o vindeiro sábado 29 no Museo Pedagóxico de Galicia (MUPEGA) A Asociación NEG dará conta aos seus asociados e asociadas das actividades realizadas ao longo do ano 2007 e exporá un novo programa de actuacións para o ano 2008.
A xuntanza inaugúrase con unha exposición que leva por título "Actividades e recursos educativos dos museos de Galicia", na que se presenta unha publicación baixo este mismo título que contará coa presenza de Felipe Arias, Director Xeral de Patrimonio e Antonio Rial Sanchez, Director do MUPEGA. Entre a temática a abordar durante a Asamblea darase conta dos numerosos encontros e actividades organizadas pola asociación, arredor de distintos contidos, como a educación para a paz, a educación no medio rural galego, a elaboración de materiais curriculares, as migracións na sociedade actual ou a normalización lingüística. Nova Escola Galega é un movemento de renovación pedagóxica creado en 1983, que agrupa a perto de 500 profesionais do ensino de toda Galicia preocupados por un modelo de escola pública, democrática, plural, integradora e en galego. Nova Escola difunde desde entón o seu ideario a través de diferentes proxectos, actividades e publicacións. Entre os últimos destacan: Vieiros na escola, en colaboración co xornal dixital Vieiros; e o Proxectoterra en colaboración co Colexio Oficial de Arquitectos de Galicia para a elaboración de materiais de educación infantil e primaria; Nova Escola galega edita a Revista Galega de Educación e realiza xornadas e encontros en diferentes puntos de Galicia. |
