- O Monte de Santa Trega, o Estuario e a Gastronomía son os recursos máis potentes de entre máis de 30 catalogados.
Coa finalidade de estruturar e dinamizar un dos sectores económicos principais para A Guarda, o Concello encargou o pasado mes de Novembro a realización dun “Plan Director de turismo” sobre o que se planificará e desenvolverá o turismo guardés nos vindeiros anos, onte foi presentado polo alcalde da vila e técnicos da empresa Trivium, redactora do Plan.
A redacción deste Plan é a primeira iniciativa que o Concello quixo por en marcha para marcar o inicio dunha nova etapa no turismo local. Neste eido, o Plan preséntase como unha ferramenta básica e estratéxica para a planificación e xestión integral do turismo guardés que permita impulsar e consolidar un desenvolvemento turístico sostible dende o punto de vista ambiental, económico e socio-cultural.
Este plan puxo de manifesto, entre outras cousas, que A Guarda é o destino máis turístico do Baixo Miño, con máis do 40% das prazas de aloxamento da comarca. Do mesmo modo, viuse reflectido o gran peso da gastronomía guardesa xa que conta co 31% das prazas de restauración. Nese sentido, a alcalde da Guarda, José M. Domínguez Freitas destacou "a importancia do sector turístico para o noso pobo" un sector que ocupa "a unha parte destacada de poboación e participa de xeito notable na xeración de riqueza".
En canto aos recursos cos que conta o concello, catalogáronse 35 de diferente índole e categoría. Os máis potentes, tanto polo seu recoñecemento como polo seu grao de explotación, son o Monte de Santa Trega, A Citania, as festas, a gastronomía, o Estuario e as praias. Neste punto destaca excesivamente o Monte, recurso sobre o que se articulou o 100% da actividade turística local e é o principal motivo da visita ao destino. Ademais grazas a él A Guarda situouse no mapa turístico nacional.
A diversificación, a clave do desenvolvemento futuro A posibilidade que supón contar cunha gran variedade de recursos permite que A Guarda poida diversificar a súa oferta turística, baseada na actualidade unicamente na visita ao Monte e a contemplación das súas vistas. O desenvolvemento do turismo natural e activo sobre os diferentes espazos naturais, a dinamización e a interpretación de tódolos recursos culturais existentes, a explotación ao máximo da súa vinculación á cultura mariñeira, o aproveitamento da unicidade das súas praias ou a optimización ao máximo da gran calidade da gastronomía, son algunhas das medidas que se deberán ter en conta para facer máis atractivo ao concello para os visitantes e acadar así que aumenten as estancias e o gasto medio no concello, dous dos problemas actuais do destino.
O excursionista: o gran protagonista O gran poder de atracción e a fama do Monte de Santa Trega fai que A Guarda reciba milleiros de visitantes. Na actualidade estas visitas prodúcense nun alto grao en forma de excursionismo, é dicir, sen pasar a noite no concello, o que orixina que éste sexa o principal visitante do concello. Por outra banda, o groso destas visitas prodúcense en época estival, cando as Rías Baixas reciben un gran número de turistas que acoden a gozar das praias dos principais destinos da zona e achéganse A Guarda como lugar de visita obrigada.
Ante esta situación, o Plan expón o gran reto de aumentar a cota de turistas sobre excursionistas, para o que se determinou como necesario un aumento das prazas de aloxamento, así como a restructuración da oferta turística actual mencionada anteriormente que posibilite un aumento das actividades a realizar no destino. |
