|
A pasada fin de semana A Guarda convertiuse nun grande espazo para o teatro. Varias programacións de autores galegos e de fóra uníronse a un curso de introdución ao teatro e á dramatización que, impatido pola compañía “Os sete magníficos + 1”, deu oportunidade a 7 persoas da zona de se iniciaren como actrices e actores.
Organizado pola Oficina Municipal de Información Xuvenil (OMIX) do Concello, esta primeira incursión guardesa na docencia teatral da man dos Sete Magníficos + 1 tivo como formador a Fran Rei, membro da compañía. Segundo o profesor, a actividade foi feita e pensada "na liña de ofertar formación teatral, xa que tamén levamos as escolas de teatro de Teo e Cuntis", afirma. Foron un total de 7, asistentes, 6 mulleres e 1 home. Segundo Fran Rei, as alumnas estiveron moi implicadas e a avaliación da actividade foi "altamente positiva", tanto pola súa parte como pola parte das asistentes, aclara o formador dos Sete Magníficos. De feito, apunta, "falouse da posibilidade de repetir noutra fin de semana". Xa nun apartado máis preto do desenvolvemento do curso, o profesor salienta que, como formador se sentiu moi cómodo, "xa que a xente foi moi receptiva". Como actor, di, "atopeime con un grupo moi creativo e moi predisposto ao xogo e á improvisación", o que permitiu montar un par de escenas finais a partir do aprendido, que resultaron bastante ben, segundo explica Fran. Os proxectos saídos do forno de Coperactiva Cultural e/ou dos Sete Magníficos máis Un sempre levan unha parte moi importante de formación. Sendo así, coma neste caso, o curso oscilou entre xogos básicos de dramatización: desinhibición, presenza escénica e movemento, entre outras técnicas teatrais. |
