- Gas Galicia SDG S.A. será a empresa encargada de realizar a rede de distribución
A Dirección Xeral de Industria, Enerxía e Minas, resolveu outorgarlle a Gas Galicia SDG, S.A. a autorización administrativa previa da rede de distribución de gas natural no termo municipal de Tomiño.
A subministración de gas natural ao termo municipal de Tomiño (Pontevedra) realizarase mediante conexión nun punto de entrega á rede de distribución, situado nas inmediacións do Instituto de Educación Secundaria, desde o que partirá a rede de distribución en media presión ao concello.
A rede de distribución proxectada está formada por unha rede básica de distribución que parte do punto de entrega descrito anteriormente e unha rede secundaria de distribución, constituída polas redes de menor diámetro (menor de 160 mm) que parten da rede básica cara aos distintos puntos de consumo.
A lonxitude prevista para a rede proxectada é de 3,22 quilometros, aproximadamente, dos cales 1,16 corresponden á rede básica e 2,06 á rede secundaria.
O orzamento ascende á cantidade de cento oitenta e catro mil novecentos oitenta e dous euros con oitenta e cinco céntimos (184.982,85 €). A empresa terá un prazo de seis meses, contado a partir da data de publicación da resolución no DOG, para solicitar á Consellería de Innovación e Industria a aprobación do proxecto de execución das instalacións, presentando o proxecto detallado, e debendo cumprirse, en todo caso, os prazos previstos no proxecto de autorización administrativa previa. |
