|
 Xabier P. Davila
Subiu a construção Como se fosse máquina Ergueu no patamar Quatro paredes sólidas Tijolo com tijolo Num desenho mágico (Chico Buarque) 96 traballadores prestarán declaración nos xulgados de Vigo, Tui, Redondela, Porriño e Cangas. A maioría, 90, foron detidos ou identificados nas folgas da construción que permitiron mellorar o convenio colectivo do sector, os outros 6 denunciados traballan no metal.
Nas 2 últimas décadas produciuse un transvase de rendas salariais cara os beneficios das empresas que aumentaron un 73% entre 1999 e 2006 mentres o poder adquisitivo real dos salarios permaneceu practicamente estancado. Paralelo á deterioración dos salarios foi o aumento da precariedade laboral. O 83% dos traballadores da construción teñen contratos por obra, é dicir, temporais. O salario dun peón era en 2007 de 13.365 euros anuais brutos. As xornadas adoitan acadar as 11 horas diarias e é habitual que o salario sexa inferior nun 25% ao tempo realmente traballado (A precariedade e sobreexplotación da forza do traballo en Galiza). O sector caracterízase polos altos índices de sinistralidade laboral: o ano pasado 24 traballadores faleceron en Galiza como consecuencia de accidentes de traballo. Por se as condicións de sobreexplotación non foran abondas nos últimos anos o empresariado do sector practica o dumping laboral contratando traballadores inmigrantes con salarios e condicións por debaixo do convenio. Porque non se resignan, para cambiar esta situación mobilizáronse os traballadores en dúas folgas. A primeira convocada en solitario pola CIG no mes de xuño e a segunda xunto con CCOO e UXT no mes de outubro. Alén da recuperación do poder adquisitivo perdido unha das principais reivindicacións era a estabilidade dos contratos. Conseguiuse que en 2008 haxa un 25% de contratados fixos e un 35% en 2009. Dúas duras folgas para conseguir que un de cada tres traballadores teña un contrato indefinido. Aínda os sindicatos haberán manter unha vixilancia atenta para que o acordado no papel sexa realidade. A fiscalía semella lenta, torpe ou ausente cando se trata de denunciar a falta de medidas de seguridade en moitas obras, para sancionar aos empresarios que contratan traballadores portugueses pagándolles por baixo do convenio colectivo, cando se obriga a facer horas extraordinarias, cando non se respectan os descansos legalmente establecidos, cando se utilizan de xeito fraudulento os contratos de obra para cubrir postos de traballo fixos. Mais, a xustiza está alerta para perseguir os traballadores que se mobilizan e loitan por unhas condicións de traballo dignas. A Constitución española no seu artigo 28 recoñece "o dereito á folga dos traballadores para a defenda dos seus intereses" e este forma parte dos dereitos fundamentais e das liberdades públicas recollidos no Título I da lei. Para alén do seu recoñecemento legal a folga é un instrumento imprescindíbel para equilibrar a relación de forzas tan desfavorábel para os traballadores na empresa. Protexer o seu exercicio é protexer a democracia e a posibilidade de loitar por unha sociedade máis igualitaria. Perseguilo, limitalo é apostar por consolidar unhas relacións laborais inxustas. Por iso estamos cos loitadores pola igualdade, cos sindicalistas da construción. |
