|
 O Alcalde do Rosal asinou onte un convenio con Vicepresidencia a través do cal, a Guardería Infantil do Rosal, integrarase na Rede de Galescolas.
Deste xeito, a guardería do Rosal pasará a estar xestionada polo Consorcio Galego de Servizos de Igualdade e Benestar, un ente de colaboración entre a administración autonómica e local, e que segundo o Vicepresidente da Xunta, o nacionalista Anxo Quintana, "non se trata de desentenderse delas, senón que se pasa dunha xestión individualizada a unha xestión mancomunada". O mandatario galego lembrou que o Consorcio Galego de Servizos de Igualdade e Benestar, ademais de ser unha ferramenta útil para os concellos porque supón unha nova maneira de entender as relacións entre Xunta e concellos, resulta tamén unha "ferramenta útil e valiosa" para as persoas, xa que ofrece respostas en positivo ás necesidades e expectativas da cidadanía.
Outross concellos asinantes foron os de Allariz, Antas de Ulla, As Neves, Burela, Culleredo, Lousame, Mondoñedo, Muíños, O Pino, O Rosal, Riós, Tomiño, Vilamartín de Valdeorras e tamén a Mancomunidade das Terras do Navea-Bibei (San Xoán de Río, Manzaneda e Pobra de Trives). Tal e como explicou o vicepresidente, a de hoxe -por onte- supón unha convocatoria que radiografía a pluralidade política do país, con presenza de todas as forzas políticas (8 alcaldes do PP, 3 do PSOE, 4 do BNG e 1 independente). |
