|
Este fin de semana disputarase en San Antoni (Eivissa) a segunda regata da copa de España de promoción, onde o Club Kaiak Tudense desprazará un total de oito padeeiros. O obxectivo dos Tudenses é mellorar o décimo sexto posto alcanzado na anterior regata, fai dúas semanas en Murcia.
No plano individual Diego Míguez tratará de meterse outra vez entre os seis primeiros en C1 infantil B, así como Sara Iñarrea que no seu primeiro ano como infantil tratará de seguir coa súa boa progresión. Mentres tanto na categoría muller infantil A, Mónica Araujo intentará resarcirse do envorco sufrido en Murcia logo dunha gran saída entre as primeiras.
De novo en canoa, pero esta vez en infantís A, Samuel Fonterosa e Daniel Fernández tratarán de meterse entre os dez primeiros clasificados.
En k1 infantil A, Pedro Carreira, Braian Ocampo e Roi Rodríguez completan a lista dos de Tui.
No que aos equipos superiores se refire, durante este gran parón competitivo (debido ao Campionato de Europa de Augas Tranquilas), atópase preparando duramente os seus dous próximos obxectivos, o Campionato de España de Maratón a finais de Maio e o Campionato de España Master a finais de Xuño.
|
