|
Martes, 07 de Febreiro do 2006 |
|
 A importancia de Bolivia
Moncho Fernández Leal A vitoria do MAS, Movemento ao Socialismo, nas eleccións de Bolivia representa moito en América Latina. Por primeira vez na historia contemporánea o continente terá un presidente indíxena, Evo Morales. Este dirixente leva anos no primeiro plano na loita, interseccionando reinvindicacións labregas, obreiras e indíxenas.
É reveladora tamén a xira que, antes da toma de posesión do cargo, fixo o futuro presidente boliviano. Dende visitar territorios amigos, coma Cuba e Venezuela, ata hipotéticos socios comerciais, coma España, Francia ou China. Distanciamento ante o imperio dos EE.UU.. Non vai ser fácil para o MAS gobernar un país empobrecido pola política neoliberal de gobernos que semellaban vicerreinados, onde se favoreceu a entrada de empresas multinacionais sen prestacións á comunidade. Cando un país coma Bolivia protagoniza unha solución alternativa colectiva representa unha esperanza para outros países do continente e unha ameaza para o mundo unipolar que sempre prefire a solución individual da migración non organizada e illada nos países onde emigran. A consideración dos países desenvolvidos coma paraísos confronta unha realidade que amosa a cada máis diferencias entre unha minoría que vive amurallada e unha maioría sen personalidade social. Os cambeos de goberno que está a vivir o continente teñen coma característica común que son procesos singulares, que non imitan a outros e que teñen un carácter frontista. Dende os anos sesenta non se vivía a nivel mundial unha situación tan proclive a unha transformación radical nas relacións entre países. A figura do Che Guevara, asasinado pola CIA hai case 40 anos no país boliviano, está máis viva ca de Barrientos, presidente daquela dos soldaditos bolivianos. |
